Lo Hialat per la Promocion de la Diversitat Lingüistica qu’ei un hialat paneuropèu qui amassa lengas regionaus, minoritàrias, indigènas, transfrontalèras e lengas nacionaus las mei petitas entà har la promocion de la diversitat lingüistica hens ua Euròpa multilingüa.
Qu’estó creat en 2007 en seguida d’amassadas entre mantuns oficis governamentaus de politica lingüistica e ONG especializadas en lo desvolopament e la revitalizacion de las lengas d’Euròpa las mensh espandidas.
Aqueth Hialat qu’ei estat finançat peu programa de formacion permanenta de la Comission Europèa e que’s vòu l’organizacion màger entà la promocion de las lengas europèas las mensh espandidas.
La soa tòca qu’ei de crear un environament dens lo quau lo multilingüisme, la diversitat lingüistica e l’aprentissatge de las lengas e sian promovuts activament de cap a totas las generacions deus europèus, en saber que 10% deus 50 milions de ciutadans de l’Union Europèa e parlan ua lenga regionau o minoritària.